Pepa o Faamatalaga
I le Kalena o Galuega a le Matagaluega 2025 ua faamauina ai, o Aso Lulu muamua uma o masina ta’itasi, e faatino ai fonotaga faale-masina a Sui o Nuu (SN), Sui o le Malo (SM) ma Sui Tamaitai o Nuu (STN) o Upolu. E 332 le aofai o Sui e tatau ona auai mai i nei fonotaga; e 47 Sui o le Malo, 128 Sui o Nuu ma le 157 Sui Tamaitai.
Na faato’a faatino i le asō le fonotaga a SN/SM/STN o Upolu ma tatala aloaia i se faigalotu na saunia e Siatafu Tinai o le Ofisa Sinia ile Vaega o Pulega a le Matagaluega, o se faifeau faauuina mai le Kolisi Faafaifeau i Malua. Na faatino e isi Matagaluega a le Malo ni folasaga, ae faatino e le aufaigaluega a le Matagaluega ni aoaoga, e siitia ai tomai ma agavaa, ma faaaupegaina ai le Saofaiga mamalu auā le faatinoina o latou tiute i tua i nuu.
O le afioga ia Papalii John Taimalelagi, o le Ofisa Sili a le Matagaluega o Faamasinoga ma le Faafoeina o Mataupu Tau Faamasinoga, na faamalamalamaina tiute o SN ile resitalaina o matai na faatino saofa’i i nuu. O le Susuga ia Lafai Makereta, o le Ofisa Sinia Autu o le Ofisa o Faigapalota sa saunoa i le folasaga e uiga i le resitalaina o tagatanuu mo le palota. O le tofā ia Fiu Ponifasio Vasa, o le Resitala o le Ofisa o Pepa Fanau, sa faatinoina le folasaga e uiga i aoaoga a le Ofisa o le a faasolo atu i nuu mo le resitalaina o pepe fananau i nuu.
Na faaleoina le agaga o le faafetai sui o Matagaluega sa auai mo latou folasaga ua faamanino atili ai tiute ma fesootaiga o galuega faaauau a SN, SM & STN e tusa ai ma le faasinomaga a le tulafono. I le māe’a ai o nei folasaga, na faatino ai aoaoga e lima ma faataamilo ai. Na vaaia le fiafia ma le faamalieina o Sui auai ina ua silafia le aogā o nei aoaoga ile faatinoina o latou tiute i tua i nuu. O le Aso Tofi o le a usu ai le fonotaga a Salafai ma o le a faatinoina ai foi aoaoga uma nei mo sui auai. O le Aso Lulu, 5 Fepuari 2025 le isi fonotaga e sosoo ai.
Faafetai tele.
Vaega o Pulega.
