ASO 4 MATI 2024
Ou te talitonu o paia ma mamalu o lenei taeao o le a taoto e iai se taimi o le fala fofola o Samoa. Ae o lenei taeao, ta te tau ma’au se’i talaloa le laufale ma fola le lautifa vaeane lo outou afifio ma tala mai o a’ao mo le faataunu’uina o le tatou ulua’i fonotaga o lenei tausaga.
Fa’amalo le tautua. Fa’amalo le folau. Malo le soifua laulelei i lenei taeao matagofie.
Ou te tulai ma le ava tele e fa’aleoina le agaga o le fa’afetai tele e tusa ai ma galuega lelei sa outou fitaituga ai i lena tausaga ua tuanai aemaise foi o galuega fa’aauau o lenei tausaga. E le faigofie lo outou vala’auina ma e le mafai foi ona matou mafaia o se galuega pe ana leai la outou lagolago.
E pei ona matauina i le tausaga ua tuanai le tele o galuega sa outou fa’atino mo le atina’eina o le tatou atunu’u i so’o se vaega ma ou te fiafia tele e fa’aleoina le lipoti o lo outou fitaituga i le tausaga 2023.
O lenei lipoti, o lo’o auili’ili atu ai le aofaiga o matagaluega sa fofogaina a latou folasaga mo le silafia e lo outou mamalu, o talosaga ma fautuaga sa outou finagalo i ai e manaomia ai se fesoasoani a le Matagaluega e tauala atu i ana pa’aga, o matatia sa mafai ona ausia i o outou faiva alofilima fa’atasi ma luitau o le galuega sa outou feagai ai i le tausaga ua mavae.
O le tāua o nei fonotaga fa’a-le-masina, e maua ai avanoa o Matagaluega a le Malo ma Fa’alapotopotoga Tuma’oti, e fa’aleo ai mataupu e manaomia ona silafia e tagatanu’u aemaise o le mana’omia o la outou fesoasoani. O le faitoto’a o so’o se mataupu i tua i Saofaiga mamalu a Ali’i ma Faipule ma Komiti a Tina ma Tamaitai, o Sui o Nu’u, Sui o le Malo ma Sui Tama’ita’i. E amana’ia ma aloa’ia foi e nu’u o latou tofi na o latou filifilia, e fai ma latou so’otaga ma le Malo. O fa’alapotopotoga nei sa latou talosagaina la outou fesoasoani – O le Komisi o le Toe Fuata’iga o Tulafono, o le Matagaluega o Soifua Maloloina, Matagaluega o Si’osi’omaga ma Puna’oa Fa’alenatura, Matagaluega o Fa’amasinoga, Ofisa o le Komesina o Sulufa’iga, Pulega o Fela’ua’iga i le Laueleele, Fa’alapotopotoga a le Goshen Trust, O le To’omaga mo e Puapuagatia, Faletalimalo a le Sheraton, ma le Fa’alapotopotoga mo Pisinisi Laiti mo Tama’ita’i. O galuega fa’atino ma matāti’a na ‘ausia lona fa’atinoga e lo outou mamalu e aofia ai:
– Le maua e alalafaga o fa’amanuiaga tauala mai poloketi ma atina’e a le Malo.
– Le si’itia o atina’e o ma’umaga ona o la outou taulamua i asiasiga.
– O le toe fa’aleleia o Fale Komiti a alalafaga.
– O le fa’amamā ma le fa’amatagofie o vai ta’ele.
– O le fa’aauauina o fuagapepe i nu’u ma fa’amautinoa le soifua maloloina o fanau o alalafaga.
– O le resitalaina o pepe fananau i tua i nu’u aemaise o tagatanu’u e maliliu i tua.
– O le tu’uina sa’o atu lea o lipoti i Komiti ma le Saofaiga a Ali’i ma Faipule e pei ona outou totofi mai ai.
– O le tele o poloketi e manaomia lo outou fa’amaonia (saini) ona o le talitonuga, a fa’aletonu outou, e a’apa atu i ai le Mālō e tusa o le Tulafono o lo’o fa’avae ai nei tofiga.
– E le gata i lea ae o loo fa’amauina fo’i le tele o talosaga mai e nisi o afioaga i ni tofiga fou (SN/SM/STN) ona o le tele fo’i o mafua’aga ese’ese.
Luitau ua molimauina:
Sa maitauina fo’i le tele o lu’itau o tausaga ua tuana’i.
– O le tele o outou tiute ma galuega fa’atino e le tu’utaimi, auā e fai a outou fono o le nu’u, e auai foi i Komiti uma a le nu’u e pei o le Komiti o Aoga, Komiti o le Saogalemu, Komiti o le Atinae, Siosiomaga, Soifua Maloloina, Fa’asao o le gataifale.
– O le tele o polokalame a Matagaluega o le Mālō, e fetuleni uma mai i le taimi e tasi, ae e iai foi lava fa’agasologa ma galuega a nu’u e fia fa’atino.
– O fete’ena’iga i tua i nu’u, ma tu’ua’ia ai nisi o outou i le le sa’o ona fa’atino outou tiute. Ae o lo’o iai fo’i le ta’iala a le Matagaluega e fa’atino ai ana saili’iliga ma iloiloga, e tusa ai ma ni faitioga e tu’uina mai. E le o po fo’i i le tele o mata’upu fa’alotoifale ua fa’ao’o mai i le Matagaluega, e a’afia ai Sui o Nu’u, Sui Tama’ita’i ma Sui o le Malo.
– O le Poloketi mo le Atina’e o Itumalo, e tāua tele lo outou auai i soalaupulega, auā o outou tonu nei e gafa taulimaina nu’u e aofia ai ma le āoina mai o fa’amaumauga patino lava i nu’u, ma o outou fo’i le so’otaga ma le Saofaiga mamalu a Nu’u.
– Ua matauina foi le faatalale o nisi o nuu i le faamatagofie ma le faamamaina o aai ma oute toe faamanatu atu o Sui o Nuu, Sui Tamaitai ma Sui o le Malo e taulamua ma fa’amaite i galuega mo le tumama lautele.
– O nisi ua faataaloa puaa ma povi ma ua aafia ai le matagofie o laufanua ma e manaomia le galulue faatasi o nuu ma afioaga, aua le malu puipuia ma le soifua maloloina o le siosiomaga o loo tatou feola ma nonofo ai.
Silasila mamao a le Matagaluega
O le va’ai mamao a le Matagaluega ma le Malo:
– O loo iai se fuafuaga i se taimi oi luma e toe iloilo ai Tulafono o Fono a Nuu ma Mataupu Tau Lotoifale faapea Mataupu Tau Tina ma Tamaitai.
– O nu’u māvae uma ua iai tofiga Sui o Nu’u ma Sui Tama’ita’i o Nu’u, ae o tofiga mo pitonu’u, e mana’omia ona iloilo lelei ina ia iai le maopo’opoga o pitonu’u ma mafai ona mapo saofaiga a nei pitonu’u.
– Mo le gasolo lelei o le tatou Atinae mo itumalo, e taua tele lo outou galulue faatasi ma Ofisa o Fono Faavae ina ia mautinoa e tofusia tagata uma o nuu taitasi i famanuiaga e tauala atu i lenei atinae.
– E manaomia e le Malo lo outou lagolagosua i tapenaga mo le Fonotele o Malo o le Taupulega o loo fuafua e faatino ile tausaga lenei. E le gata i le faamamaina o le siosiomaga ae o leisi itu pito sili ona taua o le tausiga o le filemu ma le puipuiga o tagata uma faapea le saogalemu i tua i nuu ma alalafaga.
– E tatalo atu foi mo lo outou lagolagosua i le faailoa o ni gaioiga faasolitulafono – o laau faasāina ma le aisa ona o le ogaoga o aafiaga i le puipuiga lautele o soifua o tagata.
Samoa e ua potopoto, o se oto’otoga lena o outou tiute tauave ua manino ai le telē o lo outou sao i le atina’eina o aiga, nu’u, ekalesia ma le malo. O lo outou faiva e fau i le ao fau i le po ina ia manuia Samoa. Ae o lo’o afifi mai ai ma fa’afitauli e luitauina lo outou soifua vala’auina.
E avea ai lo’u leo e fai ma fofoga taumomoli o le tatou malo, mai i le taele o matou loto, le agaga fa’afetai. Malo pale. Malo masuisui. E tua atu Samoa i la outou Falesoa, aua a gau le poutu e tali pou lalo, ae a masofa pou lalo e tali atuao. O la outou tofa ma le fa’autaga e soalaupule, tofa ma le fa’autaga e fetāla’i, tofa ma le fa’autaga e lē fa’aituau, tofa ma le fa’autaga e alofa aemaise o le tofa ma le fa’autaga e saili i le Atua. Ia saga’i ane e fa’aauau lo outou valaauina i lenei tausaga ua amatalia aua se manuia o tatou tagata nu’u.
Soifua ma ia Manuia.
